backend

Bu gün Azərbaycanın üç rayonunda Əmək yarmarkaları keçirilib

Bu gün Azərbaycanın üç rayonunda Əmək yarmarkaları keçirilib

Növbəti tədbir harada təşkil ediləcək?

Əmək və Əhalinin Sosial Müdafiəsi Nazirliyi (ƏƏSMN) yanında Dövlət Məşğulluq Xidməti tərəfindən iyunun 19-da Qax, Ağstafa və Daşkəsən rayonlarında Əmək yarmarkaları keçirilib.

Oxu.Az xəbər verir ki, bu barədə ƏƏSMN-dən məlumat verilib.

Məlumata görə, Qax rayonunda 27 müəssisə üzrə 180 boş (vakant) iş yeri, Ağstafa rayonunda 48 müəssisə üzrə 251 boş (vakant) iş yeri, Daşkəsən rayonunda isə 17 müəssisə üzrə 270 boş (vakant) iş yeri işsiz və işaxtaran vətəndaşların seçiminə təqdim edilib.

Tədbirlərdə vakant iş yerləri təqdim edən müəssisələrin nümayəndələrinin də iştirakı təmin olunub. Yarmarkalar zamanı əmək bazarının tələblərinə uyğun peşə hazırlığı kurslarına və haqqı ödənilən ictimai işlərə cəlb olunmaq istəyən şəxslərin qeydiyyatı aparılıb.

Qeyd edək ki, növbəti Əmək yarmarkasının iyunun 20-də Qazax rayonunda keçirilməsi nəzərdə tutulub.

Xatırladaq ki, cari ilin ötən dövründə Bakı şəhərində və respublikanın 6 rayon və şəhərində keçirilən Əmək yarmarkalarında ümumilikdə 919 nəfər işaxtaran və işsiz vətəndaşa münasib iş yerlərinə göndəriş verilib, 117 nəfər peşə hazırlığı kurslarına, 14 nəfər isə haqqı ödənilən ictimai işlərə cəlb olunmaları üçün qeydiyyata alınıb.

Gülnarə Zeynalova

qaynarxett.az