Qarabağdakı döyüşlərə dünya mediasında geniş yer verilib.
Fevralın 24-dən 25-ə keçən gecə Ermənistan silahlı qüvvələrinin bölmələri bütün cəbhə boyu irimiqyaslı təxribatlar törətmək məqsədilə müxtəlif istiqamətlərdə mövqelərimizə soxulmağa cəhd göstərməsi nəticəsində baş vermiş qanlı döyüşlərə dünya mediasında da geniş yer verilib.
İstiPress-in məlumatına görə, Türkiyə, Rusiya və Qərb ölkələrinin informasiya saytları Qarabağdakı döyüşləri yaxından izləyiblər.
Türkiyə mediasından isə Azərbaycana dəstək verilib. Ərdoğan hökumətinə yaxınlığı ilə tanınan “Haber7” saytı döyüşlərlə bağlı xəbəri bu başlıqla dərc edib: “Azərbaycan Ermənistana həddini bildirdi”.
Azərbaycan Müdafiə Nazirliyi bildirir ki, Ermənistan silahlı qüvvələrinin atəş nöqtəsi məhv edilib. Fevralın 25-də mövqelərimizi atəşə tutan Ermənistan silahlı qüvvələrinin uzunmüddətli atəş nöqtəsi və cəbhənin Talış kəndi istiqamətində Silahlı Qüvvələrimizin mövqeləri üzərində uçuşlar keçirməyə cəhd göstərən pilotsuz uçuş aparatı (PUA) bölmələrimiz tərəfindən məhv edilib. Qarşı tərəf itkilərə məruz qalıb.
