2016-cı ilin yayında Yerevan Polis İdarəsinin binasını zəbt edən silahlı dəstənin üzvlərini qida məhsulları ilə təmin edən və cinayətkarlarla əlaqədə ittiham olunan 49 yaşlı Artur Sarkisyan ötən gün ölüb.
Erməni mətbuatının verdiyi xəbərə görə, A.Sarkisyanın ölümü Yerevandakı seçkiqabağı gərgin vəziyyəti daha da ağırlaşdırıb. Məlumata görə, martın 16-ı axşam saatlarından başlayaraq, A.Sarkisyanın ölümünə etiraz olaraq Yerevan sakinləri Azadlıq meydanına toplaşmağa başlayıblar. Daha sonra etirazçılar Maştots prospektində yolu bağlayıblar və Ədliyyə Nazirliyinə doğru yürüş təşkil ediblər.
Etirazçılar güclü yağış altında Yerevanın mərkəzi küçələrindən keçiblər. Aksiyaya azadlıqdan məhrum edilmiş müxalifətçi Şant Arutyunyanın oğlu Şaqenin rəhbərlik etdiyi bildirilir.
Etirazçılar Azadlıq meydanında oturaq aksiya keçirməyi planlaşdırırlar.(APA)
