Həyatın dəyərini bilmək istəsəniz, bədbəxt bir qadının üzünə baxın. İlahi kitablar olmasaydı, ən müqəddəs sözləri bədbəxt qadınların söyləyəcəyinə inanardım
Bədbəxt qadınlar həyata necə baxarlar, hamımız bilərik əslində. Əksəriyyətimiz qorxarıq bir qadının gözlərinə baxmağa, amma baxdım və dinlədim, çətin və ağır olsa da… Belə bir bədbəxt taleli qadınların biri “Təmiz Dünya” ictimai birliyinin sığınacağına sığınan bir zavallı qadındır. Həyat yoldaşı tərəfindən butulka ilə zorlanan, sonra 500 AZN-ə yad bir kişiyə satılan, 4 yaşlı körpəsinin gözü önündə döyülüb, bıçaqlanan biçarə bir qadının söylədiklərini eşitsəniz, dəhşətə gələcəksiniz. Baxmayaraq ki, bu cür cinayətlər törətmiş biri hələdə azadlıqdadır. Hələ də bu qadının həyatı təhlükədədir və hədə qorxu və təhdidlər davam edir.
