backend

Ramiz Yediyarov Gədəbəyi soyhasoyda

Ramiz Yediyarov Gədəbəyi soyhasoyda















İş adamı icra başçısınin qanunsuz əməllərindən şikayətlənir

Oqtay Əliyev: "Ölkə başçısından məsələnin araşdırılmasını, mənə dəyən ziyanın ödənilməsi üçün göstəriş verilməsini xahiş edirəm"



Təəssüf ki, çoxsaylı tənqidlərə baxmayaraq, Gədəbəy Rayon İcra Hakimiyyətinin başçısı Ramiz Yediyarov yerli əhaliyə, xüsusən sahibkarlara ciddi problemlər yaratmaqda davam edir. Belə ki, məhz onun göstərişi ilə rayonun Qalakənd kəndi ərazisində min bir əzab-əziyyətlə istirahət mərkəzi tikən iş adamının obyekti qanunsuz olaraq yerlə-yeksan edilib. Şikayət ərizəsi ilə redaksiyamıza müraciət edən Gədəbəy rayon Miskinli kənd sakini Əliyev Oqtay İbrahimov oğlu icra başçısı tərəfindən incidildiyini bildirdi.

Gədəbəyli sahibkar məmur qanunsuzluğu nəticəsində on minlərlə manat xərcə düşüb: "2013-cü ilin iyulunda Ekologiya və Təbii Sərvətlər Nazirliyinin sərəncamı ilə Gədəbəy rayonunun Qalakənd kəndi ərazisində turizm-istirahət mərkəzi tikmək qərarına gəldim. Həmin sərəncamla ötən ilin iyulunda obyektin tikintisinə başladım. Gədəbəy rayonu İcra Hakimiyyəti başçısının müavini-Aqrar məsələlər şöbəsinin müdiri Rüstəm Nağıyev ötən il tikintini dayandırdı. Mənə dedi ki, icra başçısı səni gözləyir, görüşmək istəyir. Məni icra başçısının birinci müavini Qüdrət Paşayevlə görüşdürdülər. Qüdrət Paşayev dedi ki, rayonda abadlıq işləri gedir. Bizə rayonun abadlaşdırılması üçün köməklik göstərin. Əvəzində obyekt tikilib başa çatdıqdan sonra özəlləşmə üçün biz də sənə kömək edərik. Həmin vaxt onlara 20 min dollar pul verdim".

Oqtay Əliyevin sözlərinə görə, bir il imiş iş davam edirmiş: "İşlər yekunlaşan vaxt Gədəbəy rayonu İcra Hakimiyyəti başçısının müavini-Aqrar məsələlər şöbəsinin müdiri Rüstəm Nağıyev bu il iyulun 11-də yenidən işi dayandırdı. Bu, elə bir vaxt idi ki, işlər tam başa çatmışdı. Ayın 25-də açılış etmək istəyirdik. Obyekt tikilib başa çatmaq üzrəykən, daha dəqiq desəm, kosmetik işləri görən zaman icra hakimiyyətinin nümayəndələri gəlib işi dayandırdılar. Heç bir xəbərdarlıq etmədən obyektin bir hissəsini sökdülər. Min bir əzab-əziyyət hesabına bu il tikintini başa çatdırsam da, bunun qarşısını aldılar. Obyekt elə bir yerdə tikilirdi ki, tikinti materiallarını usta və fəhlələr ora bir kilometr məsafədən əllərində daşıyırdılar. İcra başçısının müavini Rüstəm Nağıyev heç bir qanuni əsas və məhkəmə qərarı olmadan obyektin bir hissəsini sökdürdü. Həmin gün ora polislər, icra hakimiyyətinin nümayəndələri də gəlmişdi. Halbuki, aidiyyəti qurumlardan, o cümlədən Ekologiya və Təbii Sərvətlər Nazirliyindən lazım olan bütün sənədləri almışdım. Sadəcə, bu işdə icra hakimiyyətinin rəhbər şəxslərinin başqa maraqları olduğundan tikintini yarımçıq saxladılar".

Şikayətçi deyir ki, obyektin bir hissəsi dağıdılandan sonra onu Gədəbəy Rayon İcra Hakimiyyətinə çağırıblar: "Həmin vaxt orada atam olub. Atam icra başçısının müavini Rüstəm Nağıyevdən soruşub ki, siz hansı əsasla bu obyekti sökürsünüz? Deyib ki, bizi icra başçısı göndərib. Atam ona etiraz edərək bildirib ki, bundan ötrü məhkəmə qərarı, müvafiq sənəd olmalıdır. Rüstəm Nağıyev bildirib ki, başçı bizə belə deyib, belə də edirik. Gedin işinizlə məşğul olun. O, atama qarşı nalayiq hərəkətlər edib və söyüş söyüb". Qüdrət Paşayev açıq-aşkar ona deyib ki 100 min dollar pul verməlisən: "Gədəbəy Rayon Polis Şöbəsi rəisinin müavini Rəhman da həmin gün ora gəlibmiş. Böyük qüvvə ilə ora gəliblər. Mənə zəng etdilər və rayona gəldim. İcra başçısının birinci müavini Qüdrət Paşayevlə görüşüb soruşdum ki, bu nə məsələdir? Axı biz ötən il danışdıq. Cavabında bildirdi ki, başçı yeni göstəriş verib, tikintiyə yenidən icazə üçün 150 min dollar pul verməlisən. Sonra isə həmin məbləği 100 minə endirdi. Ona bildirdim ki, mən bir manat da verməyəcəm. Mən verdiyimi vermişəm".

İcra başçısının birinci müavini Qüdrət Paşayev bundan sonra iş adamını hədələyib: "Mənə dedi ki, sən sən ol, biz də biz. Gör sənin obyektini nə günə qoyacağıq. Cavabında bildirdim ki, məhkəmənin qərarını gətirin, nə istəyirsinizsə edin. Bir həftə gözlədilər. Sonra əllərində heç bir əsas, məhkəmə qərarı, bildiriş olmadan, polisin müşayiəti, ağır texnikanın köməyi ilə, icra başçısının müavini Rüstəm Nağıyevin rəhbərliyi altında obyekti tamamilə yerlə-yeksan etdilər. Hətta obyektin fundamentini belə, darmadağın etdilər. Mənim həmin obyektə təkcə nağd şəklində 120 min manat xərcim çıxmışdı. Hələ digər xərcləri nəzərə almıram. Onları da nəzərə alsam, 150 min manata qədər xərcim çıxıb. Fəhlələr daşı, taxtanı, sementi bir kilometr piyada aparırdılar. Bu qədər əzab-əziyyətlə qurduğumuz turizm-istirahət mərkəzini amansızlıqla darmadağın etdilər".

Sahibkar başına gələn haqsızlıqlarla bağlı rayonun icra başçısına müraciət etsə də, məmur onu qəbul etməyib: "İcra başçısına müraciət etsəm də, məni qəbul etmədi. Bakıya qayıtdığım gün obyektin bütün qalan hissələrini də dağıtdılar. Çünki mən onların əlavə pul təkliflərinə razılıq vermədim. Ölkədə bu cür gözəl şərait yaratdığına və sahibkarlığın inkişafına göstərdiyi dəstəyə görə ölkə prezidenti cənab İlham Əliyevə öz minnətdarlığımı bildirirəm. Biz gədəbəylilər ölkə başçısının həyata keçirdiyi işlərə baxıb həmişə fəxr etmişik və bu gün də edirik. Amma Ramiz Yediyarov prezidentin gördüyü müsbət işlərin üstündən sanki xətt çəkməyə çalışır. Prezidentimiz Rusiyada və digər xarici ölkələrdə yaşayan soydaşlarımızı Azərbaycana dəvət edir ki, iş adamları respublikamızda sahibkarlıqla məşğul olsunlar. Demir ki, bəzi rayonların icra başçılarına haqq versinlər. Ölkədə bu cür gözəl şərait yaratdığına və sahibkarlığın inkişafına göstərdiyi dəstəyə görə ölkə prezidenti cənab İlham Əliyevə öz minnətdarlığımı bildirirəm. Biz gədəbəylilər ölkə başçısının həyata keçirdiyi işlərə baxıb həmişə fəxr etmişik və bu gün də edirik. Amma Ramiz Yediyarov prezidentin gördüyü müsbət işlərin üstündən sanki xətt çəkməyə çalışır. Üzləşdiyim haqsızlıqla bağlı hüquq-mühafizə orqanlarına teleqramlar vurdum. Daxili İşlər Nazirliyinin "102 "Qaynar xətt"inə dəfələrlə müraciət etdim. Daxili İşlər Nazirliyinin "102 "Qaynar xətt"indən mənə gülməli cavab verdilər: "İcra başçısı polisə göstəriş verir və polis də bunu həyata keçirir. Belə çıxır ki, icra başçısı polisə vətəndaşı güllələmək əmrini versə, polis vətəndaşı güllələyəcək? Polisin nə ixtiyarı var ki, məhkəmə qərarı olmadan obyektin qanunsuz söküntüsündə iştirak etsin. Hətta polislər bu söküntünü telefona çəkən əməkdaşlarımızı da təhqir edib. Belə olmaz axı. Əgər mənə rayonda obyekt tikməyə icazə vermirdilərsə, nə üçün 20 min dollarımı aldılar. Bir il idi tikinti işi aparırdım, niyə bunun qarşısını vaxtında almırdılar? Nə üçün obyekt istifadəyə verilən ərəfədə onu söküb yerlə-yeksan etdilər? Mən artıq Gədəbəy rayonuna gedə bilmirəm. Ramiz Yediyarov Gədəbəy Rayon Polis Şöbəsinə göstəriş verib ki, əgər Oqtay Əliyev şikayətini geri götürməsə, onu həbs edin. Məni hansı əsasla həbs edəcəklər? Artıq neçə gündür polislər rayondakı doğmalarıma təzyiq göstərir, onları narahat edirlər".

Şikayətçi deyir ki, rayon rəhbəri ölkənin mövcud qanunvericiliyinə hörmətsizlik göstərir: "Prezident xalqın qayğısına qalır icra başçısı isə camaata əlavə problemlər yaradır. Gədəbəyin icra hakimi birinci müavini Qüdrət Paşayevlə baş-başa verərək özbaşınalıq edir. Keçən il obyektin tikintisinə razılıq vermişdilər, amma bu il gəlib sökdülər. Bunu necə başa düşmək olar? Əgər tikinti qanunsuz idisə, niyə keçən il icazə verirdilər? Rayonun əksər kəndlərində insanlar çox ağır şəraitdə yaşayırlar. Onlar üçün yeni iş yeri açmaq istəyirdim. Ki, gəlib burda işləyib ailələrini dolandırsınlar. Başçı buna imkan vermədi. Ramiz Yediyarov onlarla insanın çörəyinə bais oldu. İcra başçısı vəzifəyə keçən gündən bir dənə də olsun müsbət iş görməyib. Gədəbəydə məmur özbaşınalığı ərşə dirənib. Prezident dəfələrlə vurğulayıb ki, döyüş bölgəsində yerləşən rayonlarda əhalinin rifahının yüksəldilməsi məqsədilə hər cür şərait yaradılmalıdır".

Oqtay Əliyev sonda üzünü Azərbaycan Respublikasının prezidentinə, baş prokuror Zakir Qaralova, daxili işlər naziri Ramil Usubova tutdu: "Cənab prezident İlham Əliyevə müraciət edib xahiş edirəm ki, bu məsələnin araşdırılması üçün göstəriş versin. Ramiz Yediyarovun əməlləri cinayət əməlləridir. Xahiş edirəm o, cəzalandırılsın və mənə dəyən ziyan ödənilsin".

Almaz