İimişli Olimpiya İdman Kompleksində əməkdar məşqçi Qalib Şükürovun 50 illik yubileyinə həsr olunmuş sərbəst güləş üzrə kiçik yaşlı yeniyetmələr və gənclər arasında beynəlxalq “Dostluq Kuboku” yarışı keçirilib.
Yarışın baş koordinatoru, əməkdar məşqçi Ramin Allahverdiyev tədbir haqqında öz təəssüratlarını Olimpsport.az-la bölüşüb.
"Nəzərinizə çatdırım ki, ilk dəfə idi ki, belə bir formatda ölkəmizdə yarış keçirilirdi. Nəinki ölkəmizdə, beynəlxalq miqyasda da bu cür yarışın keçirilməsinin şahid olmamışam. Ona görə ki, yarışda üç yaş qrupu üzrə, 2004 – 2006 , 2007 – 2009 və 1998 – 2000 ci il təvəllüdlü idmançılar bir komandada olmaqla mübarizə aparırdılar. Çünki, adətən istənilən yarışlar bir yaş qrupu üzrə keçirilir. Əsas diqqət çəkən məqam isə 9-11 yaşlı uşaqların belə bir mötəbər beynəlxalq yarışda qüvvələrini sınamaları idi. Çünki, bu yaşda uşaqların çox nadir hallarda həm ölkə, həm də xaricdə rəsmi olaraq yarışlarda iştiraklarının az şahidi oluruq. Bu da onlar üçün bir şans idi ki, bu yaşda publika qarşısına çıxaraq böyük yarış həyəcanını keçirmiş olsunlar. Onların belə bir mərhələni indidən keçərək təcrübə toplamaları gələcəkdə daha da böyük yarışlarda özlərini sərbəst hiss edəcəklərinə təkan verəcək. İlk dəfə olaraq təcrübədən keçən bu yarış digər ölkələrin də böyük marağına səbəb olmuş və onlar da bu təcrübədən yararlanmaq istədiklərini bildirmişlər. Artıq yarışımızda iştirak etmiş İran İslam Respublikasının güləş rəhbərliyi eyni ilə belə bir yarışın tezliklə Tehranda keçirilməsinə hazırlıq görürlər.
Ümumiyyətlə, “Dostluq Kuboku” yarışını həyata keçirmək çoxdankı arzum idi. İlk şəxsi müəllimim olan Qalib Şükürovun 50 illik yubileyi bir fürsət oldu ki, bu yarışı həyata keçirək. Bunun üçün İmişli rayon Gənclər və İdman İdarəsinə , Azərbaycan güləş Federasiyasına və Azərbaycan Respublikasının Gənclər və İdman Nazirliyinə müraciət etdik . Müraciətimizi nəzərə alan həmin qurumların təstiqlədiyi əsasnamə üzrə yarışımızı keçirdik. Fürsətdən istifadə edərək yarışımıza maddi və mənəvi dəstək olan hər bir kəsə, başda Milli Olimpiya Komitəsi olmaqla İmişli Olimpiya İdman Kompleksinin Direktoru Telman müəllimə və Tovuz Gənclər Evinə öz dərin minnətdarlığımı bildirirəm.
Qeyd etmək istərdim ki, bu yarışı ənənəvi olaraq hər il nəinki İmişlidə , digər bölgələrimizdə də keçirmək fikrindəyik.
Sevinirəm ki, ilk dəfə keçirilən “Dostluq Kuboku”nu 4 ölkənin milli komandasını məğlub edən Azərbaycan komandası qazandı .Düzdür, əslində qazanan dostluq oldu. Çünki, bizim əsas məqsədimiz qonşu ölkələrlə dostluq və güləş əlaqələrinin daha da inkişaf etdirilməsi idi."
Yarışın təntənəli açılış mərasimdə İmişli güləş məktəbinin yetirmələri və veteran idmançılar Azərbaycan güləş federasiyasının fəxri diplomları ilə təltif olundular.
Qeyd edək ki, beynəlxalq “Dostluq Kuboku” uğrunda ölkəmizlə yanaşı Rusiya, Gürcüstan, İran və Özbəkistan komandalarının mübarizəsində ikinci yeri Rusiya, üçüncü yeri Özbəkistan , dördüncü yeri İran , sonuncu yeri isə Gürcüstan komandası tutmuşdur.
