Vəfa Mürsəlqızı yaradıcılığından lirik şeirlər
LAP SƏNİ ATMAĞIM GƏLİR.
Əllərim elə darıxıb,
Əlindən tutmağım gəlir,
Çıxıb dinimdən, donumdan,
Günaha batmağım gəlir.
Göyün yedinci qatında,
Günün ən xoş saatında,
Ayaqlarının altında,
Yıxılıb yatmağım gəlir.
Qurban olum gəlişinə,
Qaçım gəlim görüşünə,
Sənin bircə gülüşünə,
Dünyanı satmağım gəlir.
Ürəyi qan günlərimi,
Qəlbi viran günlərimi,
Bütün yaman günlərimi,
Sənlə unutmağım gəlir.
Həsrətə bişib getməyim,
Yolumu çaşıb getməyim,
Dalınca düşüb getməyim,
Aləmi qatmağım gəlir
Dərdimin üzünə gülüb,
Allahın yoluna gəlib,
Elə sevirəm ki, ölüb,
Lap səni atmağım gəlir.
***
BAĞIŞLA...
Bu sevginin günahını,
Telimdə dənə bağışla,
Hər dəfə bağışlayırsan,
Bu dəfə yenə bağışla!
Yetmədikcə vüsalına,
Çarəm qaldı xəyalına,
Qibləm dedim camalına,
İmana dinə , bağışla!
Arzular çox, ömür gödək,
Sən zalım, mən qəlbi kövrək,
Ən qiymətli hədiyyə tək,
Özünü mənə bağışla!
