“Birinci qız binaya girdi...”
Paytaxtda məktəbli qıza naməlum şəxs tərəfindən hücum edilib. Hadisə Bakının Xətai rayonu, Zığ şossesi məhəllələrdən birində qeydə alınıb.
qaynarxett.az xəbər verir ki, ANS TV-nin məlumatına görə, yaxınlıqdakı məktəbdən evə üz tutan 10-cu sinif şagirdi mənzilə daxil olmaq istəyərkən onu izləyən naməlum şəxs tərəfindən döyülüb.
Müşahidə kameralarının lentə aldığı görüntülərə əsasən hadisə saat 12:15 radələrində baş verib. Bu zaman məktəbli qız binanın qapısından içəri daxil olub. Az sonra onun ardınca naməlum şəxs gəlib. Bundan sonra isə hadisə binanın liftində baş verib.
Bu əməli törədən şəxs yaxınlıqdakı mağazanın müşahidə kameralarından yan qaça bilməyib. Görüntülərdən aydın olur ki, şübhəli şəxs əvvəlcə qızı izləyir. Daha sonra şagird binadan içəri daxil olduqdan sonra həmin şəxs də onun ardınca bloka girir.
Cəmi üç dəqiqədən sonra məktəbli qızı döyməkdə şübhəli bilinən şəxs binanı tərk edərək qaçır. Mağaza satıcısının dediyinə görə, yetkinlik yaşına çatmayan qız döyüldükdən sonra anasına zəng vurub. O, dərhal mağazaya gətirilib. Qızın üzü tanınmaz hala salınıb. Burada ona ilkin tibbi yardım göstərildikdən sonra xəstəxanaya çatdırılıb.
Şahid Ceyran Balakişiyevanın sözlərinə görə, qızın üz-gözü tanınmaz halda idi. Polislər onu götürüb apardılar:
“Səhərlər evdə adam olmur. Qız dərsdən gələndə oğlan arxasınca düşüb. Hadisə baş verməmişdən öncə birinci qız binaya girib və ondan iki dəqiqə sonra oğlan girib”.
Hadisə günorta saatlarında baş verdiyindən və məktəbli qızın xəstəxanaya yerləşdirildiyindən ailə üzvlərini mənzildə tapa bilmədik.
Artıq faktla bağlı cinayət işi başlanılıb. Əraziyə rayon hüquq-mühafizə orqanları və Bakı Şəhər Baş Polis İdarəsinin əməkdaşları cəlb edilib.
Verilən məlumata görə, bu əməli törədən şəxs 27-30 yaşlarında olub. O, ilk olaraq qızı liftdə vurub, daha sonra mənzilə daxil olmaq istəyib. Hadisənin dəqiq səbəbləri bu əməli törədən şəxsin tapılmasından sonra məlum olacaq.
Artıq faktla bağlı şübhəli şəxsin axtarışlarına başlanılıb.
