Londonda keçmiş KQB polkovniki, Rusiya xüsusi xidmət orqanları tərəfindən radioaktiv maddə ilə şüalandırılaraq öldürülən Aleksandr Litvinenkonun işi üzrə məhkəmə prosesinin gedişində daha bir neçə sensasion detal açıqlanıb
qaynarxett.az Virtualaz.org saytına istinadən xəbər verir ki, “The İndependent” qəzeti məhkəmənin gedişində Litvinenkonun cəsədinin yarılması zamanı həkimlərin nə dərəcədə böyük təhlükə ilə üzləşdiyinə dair sübutlar təqdim edilib.
Britaniya Daxili İşlər Nazirliyinin eksperti, patoloqoanatom-həkim Ben Svift deyib ki, Litvinenkonun cəsədinin yarılması dünya tarixində ən təhlükəli tibbi əməliyyat idi.
Cəsədin yarılmasında iştirak edən digər həkim Nat Keri də onun sözlərini təsdiqləyib.
Cəsədin yarılması zamanı patoloqoanatomlar misli görünməmiş təhlükəsizlik tədbirləri görüblər. Onlar ikiqat mühafizə geyim dəsti geyiniblər, hava filtrləri ilə təchiz olunmuş xüsusi kapşonlar taxıblar. Cəsədin yarıldığı binadakı havada da ölümcül təhlükəli olub. Cəsədin yarılması prosesində mütəxəssislərdən biri Litvinenkonun qanının daimi radiasiya nəzarətini həyata keçirib.
Məhkəmədə həmçinin bildiriblər ki, Litvinenkonun qanında ölümcül təhlükəli nüvə izotopu həkimlərdən birinin qan və toxuma nümunələrini qeyri-adi şəkildə təhqiq etməsi nəticəsində üzə çıxıb. Lakin buna baxmayaraq Litvinenkonun qanında ölümcül polonium maddəsini onun öldüyü gün atom energetikası üzrə idarədə aparılmış analiz nəticəsində müəyyən etmək mümkün olub.
Litvinenkonun dul xanımının maraqlarını məhkəmədə müdafiə edən vəkil Ben Emerson deyib ki, poloniumun tətbiqi ilə törədilən qətl heç bir iz buraxmadığından bu maddə ideal silahdır.
Aparıcı patoloqoanatom Nat Keri deyib ki, əgər xüsusi araşdırma aparılmasaydı, Litvinenkonun ölümünün səbəbi heç vaxt üzə çıxmayacaqdı. O, əlavə edib ki, Böyük Britaniyada, ola bilsin hətta dünyada alfa-şüalandırma yolu ilə insan qətli halı ona məlum deyil.
Məhkəmədə Britaniyanın aparıcı nüvə alimlərindən birinin (məhkəmə işində “A1” kod adı ilə göstərilir) rəyi də elan edilib. Orada deyilir ki, poloniumun ölümcül dozası olduqca kiçikdir. Cəmi bir nanoqramdan (qramın milyardda biri) bir mikroqrama qədər (qramın milyonda biri) polonium insanı öldürməyə kifayət edir.
Litvinenkonun poloniumla zəhərləndiyini onun Bakıda doğulmuş keçmiş KQB zabiti (hazırda Dövlət Dumasının deputatıdır) Andrey Luqovoy və Dmitri Kovtunla 2006-cı il, noyabrın 1-də Londondakı “Millenium” otelinin barında görüşü zamanı çay içdikləri keramik çaynikdəki izlər də təsdiq edib. Həmçinin Litvinenkonu öldürmək üçün göndərilən xüsusi xidmət agentlərinin oteldə hansı nömrələrdə qaldıqları açıqlanıb.
Analizlər müəyyən edib ki, Litvinenkonu zəhərləmək üçün istifadə edilən polonium maddəsi süni yolla, yəni hansısa nüvə mərkəzində əldə edilib.
Xatırladaq ki, bundan əvvəl - yanvarın 27-də keçirilən məhkəmə iclasında Litvinenkonun ölümündən qabaq yazdığı məktubu elan edilib. Orada keçmiş KQB zabiti ölümünə görə Rusiya prezidenti Vladimir Putini günahlandırır.
“Sistemi bildiyim üçün mən əminəm ki, başqa ölkənin sakinini onun öz ərazisində, xüsusən də Britaniyada öldürmək əmrini ancaq bir adam verə bilər. Bu, Rusiya prezidenti Vladimir Putindir”- Litvinenko ölümqabağı yazılı ifadəsində bildirib.
A.Litvinenko 2000-ci ildə Britaniyaya qaçıb və bu ölkənin Mİ6 kəşfiyyat xidməti ilə əməkdaşlığa başlayıb. 2006-cı ilin noyabrında isə 43 yaşında əzab-əziyyətlə ölüb. Litvinenkonun poloniumla zəhərlənərək öldürülməsinə görə Britaniyada keçmiş bakılı KQB zabiti Luqovoy və onun həmkarı Kovtun təqsirli bilinir. Britaniya hakimiyyəti bu qətlin Rusiya kəşfiyyatı tərəfindən təşkil edildiyini sübuta yetirib.
