Tovuz Gənclər Evinin təşkilatçılığı ilə ölkənin məşhur idmançıları ilə tovuzlu gənclərin və Tovuz İdman ictimaiyyətinin görüşü keçirilib. 31 dekabr Dünya Azərbaycanlılarının Həmrəylik günü və Yeni İl münasibətiylə keçirilən görüşdə futbol üzrə milli komandamızın üzvü, "Neftçi" futbol klubun kapitanı Ruslan Abışov, tanınmış xalq pəhləvanı Vüsal Cavadov, Tovuzun "Turan" futbol komandasının üzvləri və veteranlar da iştirak ediblər. Görüşdə məqsəd Tovuzlu gənclərin öz kumirləri ilə canlı ünsiyyətdə olmaları və bununla da onlarda idmana olan marağı artırmaq və gələcəkdə peşəkar idmançı kimi yetişməkləri üçün dəstək olmaq olub.
Səmimi atmosferdə keçən görüşdə çıxış edənlər gənc idmançılara öz məsləhətlərini veriblər. Onlarla səmərəli söhbətlər ediblər. Gənclər də öz növbələrində kumirlərinə onları maraqlandıran suallar veriblər. Sonda isə ən maraqlı sual müəllifi qonaqlar tərəfindən xüsusi mükafata layiq görülüblər.
Qeyd edək ki, tədbirin davamında Gənclər Evinin rəhbərliyi tərəfindən Tovuz futolunun inkişafında göstərdikləri fəaliyyətə görə Eltay Aslanov, Nizami Sadıqov, Elxan Abıyev, Etimad Qurbanov və Samir İsmayılov fəxri fərmanla təltif olunublar.
