Azərbaycan hökuməti illərdir dövlət satınalmalarında şəffaflığın, rəqabətin və hesabatlılığın artırıldığını bəyan edir. Prezident dəfələrlə dövlət vəsaitinin hər qəpiyinə görə məsuliyyət tələb olunduğunu bildirib. Ancaq görünür, bəzi dövlət müəssisələrində köhnə yanaşmalar hələ də yaşayır. Cəlilabad Dövlət Peşə Təhsil Mərkəzinin birinci korpusunun əsaslı təmiri üçün 72 min 449 manat dövlət vəsaiti ayrılıb. Maraqlıdır ki, bu vəsait açıq tender yolu ilə deyil, birmənbə satınalma üsulu ilə xərclənib. Başqa sözlə, bazarda fəaliyyət göstərən digər tikinti şirkətlərinə bu iş uğrunda yarışmaq imkanı verilməyib.
Qanun müəyyən hallarda birmənbə satınalmaya icazə verir. Lakin belə halların hər biri ciddi əsaslandırma tələb edir. Çünki rəqabətin olmadığı yerdə həmişə bir sual yaranır: niyə məhz bu şirkət?
Seçilən podratçı – "Proqress İnşaat En" MMC haqqında açıq mənbələrdə demək olar ki, heç bir məlumat yoxdur. Rəsmi internet səhifəsi yoxdur, ictimai fəaliyyəti görünmür. Bununla belə, şirkət milyonlarla manatlıq dövlət sifarişləri almağa davam edir.
Belə vəziyyət istər-istəməz dövlət satınalma sisteminin şəffaflığı barədə suallar doğurur.
Məsələnin digər diqqətçəkən tərəfi isə Cəlilabad Dövlət Peşə Təhsil Mərkəzində rəhbərliyin dəyişməsi fonunda baş verən proseslərdir.
2026-cı ilin yanvarından müəssisəyə rəhbərlik Ramil Əmənova həvalə olunub. O, uzun illər dövlət qulluğunda çalışmış, müxtəlif vəzifələrdə təcrübə toplamış şəxsdir. Məhz buna görə də cəmiyyət onun rəhbərliyi dövründə şəffaf idarəçilik, açıq hesabatlılıq və dövlət vəsaitinə məsuliyyətli münasibət gözləməkdə haqlıdır.
Bəlkə də bu satınalma proseduru onun rəhbər təyin olunmasından əvvəl başlanıb. Lakin bu gün həmin müqavilənin icrasına, görüləcək təmir işlərinin keyfiyyətinə, ayrılmış dövlət vəsaitinin səmərəli xərclənməsinə və nəticənin qəbuluna görə artıq məsuliyyət məhz müəssisə rəhbərliyinin üzərinə düşür.
Başqa sözlə, 72 min manatlıq bu təmir layihəsinin siyasi, inzibati və mənəvi məsuliyyətini artıq Ramil Əmənov daşıyır.
Əgər birmənbə satınalma qanuni əsaslarla həyata keçirilibsə, bunu izah etmək çətin olmamalıdır.
Əgər podratçı həqiqətən ən peşəkar seçimdirsə, bunu sənədlərlə göstərmək mümkündür.
Əgər görüləcək iş keyfiyyətlidirsə, ictimai nəzarətdən çəkinməyə ehtiyac yoxdur.
Ancaq susqunluq həmişə sualları artırır.
Bu gün Cəlilabad Dövlət Peşə Təhsil Mərkəzinin direktoru Ramil Əmənov qarşısında sadə, lakin prinsipial seçim dayanır: ya dövlət vəsaitinin xərclənməsi ilə bağlı bütün suallara açıq cavab verərək şəffaf idarəçiliyin tərəfdarı olduğunu nümayiş etdirəcək, ya da bu satınalma ətrafında yaranmış şübhələrin məsuliyyətini öz üzərinə götürmüş olacaq.
Cəmiyyət isə çox sadə suallara cavab gözləyir:
- Nəyə görə açıq tender keçirilmədi?
- Birmənbə satınalma hansı hüquqi əsaslarla tətbiq edildi?
- Niyə məhz "Proqress İnşaat En" MMC seçildi?
- Təmir işlərinin keyfiyyətinə kim və necə nəzarət edəcək?
- Müqavilənin icrası barədə ictimaiyyətə müntəzəm məlumat veriləcəkmi?
Bu suallar kimisə ittiham etmək üçün deyil, dövlət vəsaitinin taleyinə aydınlıq gətirmək üçündür. Çünki dövlət büdcəsi heç bir müəssisə rəhbərinin şəxsi büdcəsi deyil. Hər manat xalqın vəsaitidir. Xalqın pulunun xərcləndiyi yerdə isə cavabdehlik də, hesabat da, şəffaflıq da mütləq olmalıdır.
Qarşı tərəfin də mövqeyini dərc etməyə hazırıq.
