Sabirabadın uşaq ölümlərinin meydanına çevrilmiş xəstəxanası səlahiyyət sahiblərinin biznes şəbəkəsinə çevrilib.
Belə ki, Sabirabadın Mərkəzi rayon Xəstəxanasında uşaq ölümləri günümüzün ən çox müzakirə olunan problemlərindən biri olaraq hələ də qalmadadır. Baxmayaraq ki, xəstəxanada baş alıb gedən xoşagəlməzliklərlə bağlı vətəndaşlar Səhiyyə Nazirliyinə və eləcə də hüquq-mühafizə orqanlarına dəfələrlə müraciətlər ediblər. Həmişə olduğu kimi xəstəxananın baş həkimi Əziz Mikayılov, sanki heç nə olmamış kimi həmişə sudan quru çıxmağa çalışıb. Görəsən, buna səbəb nədir? Axı, zərərçəkmişlərin verdiyi məlumatlarda deyilir ki, uşaq və ana ölümləri Əziz Mikayılovu və ixtisasca sınıqçı adını daşıyan Qalib adlı müavinini heç vaxt narahat etməyib. Qazandıqları nələrinsə hesabına həm rayon prokurorluğunu, həm də digər aidiyyəti qurumların rəhbərlərini ram edirlər. Xəstəxanada hər cür qanunsuzluqlara da əl atılır. Xəstəxanaya aparılan xəstənin, xüsusilə də doğum şöbəsində əvvəlcə xəstənin yaxınları ilə həkimlər "danışıqlara" başlayırlar, elə ki sövdələşmə baş tutmur, o halda Əziz Mikayılovun doğuş üçün müəyyən etdiyi məbləğ verilmədi, xəstə həkimlərin "qurbanına çevrilir". Xəstəxana indi nəinki Sabirabadın, eləcə də qonşu rayonların da vətəndaşlarına sanki ölüm düşərgəsini xatırladır. Mirzəyeva Tamilə Saatlı rayon sakinidir. Onunla söhbət zamanı o, başına gətirilənləri ürək ağrısı ilə danışdı. Xəstəxanada çəkdiyim iztirabı heç vaxt unuda bilmirəm. Bir neçə ay əvvəl hamilə olan qızımı xəstəxananın doğum şöbəsinə apardıqda, adını bilmədiyim bir tibb bacısı mənə yaxınlaşdı. Doğrusu elə fikirləşdim ki, qızımın vəziyyəti barədə nəsə deyəcək. Yanılmışdım, sən demə qızımın səhhəti onların heç vecinə deyilmiş. Tibb bacısı qızımın adi doğuş keçirə bilmədiyini, uşağın cərrahiyyə əməliyyatı ilə götürülməli olduğunu bildirdi. Tibb bacısına cavabım çox qısa oldu. Necə lazımdırsa elə də edin, təki uşaq və qızım salamat olsun. "Xala bundan ötrü gərək əlin cibində ola... "İmkanın var?" deyə tibb bacısı mənə sual etdi. İndi imkanım yoxdur, sonra verərəm dedikdə, üzünü bozardan tibb bacısı geri dönərək getdi. Qızımın tam baxımsız halda qaldığını biləndə içəri keçmək istədim, məni buraxmadılar. Xadimədən öyrəndim ki, qızımı ağır vəziyyətdə çarpayıya atan Güllü həkim halını da pozmur. Düz dörd saatdan çox bətnində çırpınan uşaq boğularaq öldü. Güllü həkimi çox axtarsam da, tapa bilmədim. Cavab verdilər ki, o burada yoxdur. Baş verən ölüm hadisəsindən sonra Səhiyyə Nazirliyinin qaynar xəttinə zəng edib həkimlərin qeyri-insani əməlləri və cinayətləri barədə bir çox məlumatlar verdim. Səhəri gün isə, Sabirabad rayon Prokurorluğuna gedib şikayət ərizəsi verdim. Ramin adlı müstəntiq məndən və qızımdan izahat aldı və o gedən də getdi. Nə Səhiyyə Nazirliyindən, nə də ki Sabirabad rayon Prokurorluğundan bu günə kimi bizi bir kimsə itirib axtarmadı. Bu qaydayla da şikayət ərizəm ört-basdır edildi. Bu da təbii ki, Əziz Mikayılovun himayəsinə sığınan həkimlərin bir çox qanunsuz əməllərini sərbəst şəkildə həyata keçirmələrinə şərait yaradır. Tamilə Mirzəyeva onu da bildirdi ki, nəvəsinin hansı səbəbdən ölməsi barədə xəstəxanadan arayış verilməlidir. Bunu da ala bilmir. Bir neçə dəfə Qalib həkimin yanında olsa da, qarşı tərəf onu otaqdan qovub. Çünki, arxalarında xəstəxanadan 200 metr aralı məsafədə prokurorluq yerləşir. Cinayətkarlara qarşı mübarizə aparmalı olan prokurorluq əməkdaşları, göründüyü kimi Əziz Mikayılova həmrəy olaraq, xəstəxanada öldürülən uşaqların hesabına, ancaq özlərinə gün ağlayırlar. Gözləri yaş içində qalan Tamilə Mirzəyeva isə üzünü mənə tutaraq bircə onu dedi: "Bala, bunu Allah da götürməyəcək" - beləcə sağollaşıb getdi. Bizə isə ancaq Tamilə Mirzəyevaya səbr diləmək qalır. P.S. Qarşı tərəfə münasibət haqqı tanıyırıq.
