Xəbər verdiyimiz kimi, fevralın 8-də 23 yaşlı Nigar Vahabova intihar edib. Onun ölümü ilə bağlı bacısı Aytac Vahabova bir sıra maraqlı məqamları açıqlayıb. O, bacısının ölümündə Nigarın sevgilisi Bəhruz Əliyevi günahlandırıb.
AzadQadin.az BiG.AZ-a istinadən Aytac Vahabovanın müsahibəsini təqdim edir:
"Nigarın həyatında Bəhruz Əliyev adlı oğlan olub. Onlar 2 il yarım münasibətdə olub. Nigar biləndə ki, o əvvəllər evli olub münasibətlərini bitirmək istəyib. Bu isə 2014-cü ildə baş verib.
Bəhruz isə ondan əl çəkməyib və onu izləməyə başlayıb. Hətta onu bıçaqla hədələyib xəsarət də yetirmişdi. Biz bu haqda polisə müraciət etmişdik.
2 ay Bəhruzdan səs çıxmadı. Amma sonra yenidən Nigarı izləməyə başladı. Biz yenə polisə müraciət etdik, amma polis heç nə etmədi.
Nigarın ölümündən 2 gün əvvəl , yəni fevralın 6-sı Bəhruz bacımın arxasınca iş yerinə gedib.
Nigar 102-yə zəng vurub. O mənə mesaj da yazmışdı, screenlər məndədir. O zaman Bəhruzun Nigarın qolundan tutaraq dartmasını iş yoldaşları da görüb. Bacımın ölümündə günahkar sevgilisdir.
Bazar günü Bəhruz evimizə gəldi və qapımızı döyməyə başladı. Anam ona bildirdi ki, polis çağıracaq. Lakin Bəhruz " Kimi istəyirsən çağır, onsuz da onu öldürəcəyəm” deyə qışqırırdı.
Qonşularımız buna şahiddir.
Birinci gün, fevralın 8-i isə Nigar özünü asdı. Nigar mənə demişdi ki, Bəhruz onun Facebook hesabını ələ keçirib onu şantaj edir. Nigarın ölümündən sonra, fevralın 10-da mən Nigarın Facebook hesabının onlayn olduğunu gördüm. Biz ona video zəng vurduq, o isə açaraq "Nə istəyirsən? Cəhənnəm ol!” deyərək qışqırdı və səhifəni bağladı.
Nigarın telefonu iPhone idi, iCloud sistemi ilə işləyirdi. Bəhruz isə həmin sistemin şifrəsini bilirdi, daxil olub bütün yazışmaları silib.
Aytac Vahabova bildirir ki, bunlarla bağlı Yasamal rayon prokuroru Cahangir Şükürova müraciət edib, amma hələ ki, nəticə yoxdur.
"Qonşular, taksi sürücüsü, qardaşım Nicat, gəlinimiz belə Bəhruzun bizim evdə olduğunun şahididir. Amma Bəhruz hələ də cinayət məsuliyyətinə cəlb edilməyib, azadlıqdadır.
Düşünürəm ki, Nigar bizə bunu deyə bilərdi, amma yəqin ki, utanıb. O, Bəhruza görə işini belə dəyişmişdi, bütün günü stress içində idi. Bəhruz onun çantasını oğurlamışdı, bütün kontaktını ələ keçirmişdi. Sonra Nigarın şəkilərini vatsapa göndərib "Mən onu sevirəm, o mənimdir” deyə yazmışdı.
Bəhruz iki dəfə evli olub, bildiyimə görə həyat yoldaşının biri onun əlindən xaricə qaçıb.
Fevralın 8-də Bəhruz bacımın rəfiqəsi Səbinəyə zəng vurub və "Nigar işə gəlməyib, onu polis axtarır, gəl, bəlkə sənə qapını açar” deyib. Sonra Səbinəni götürüb və qardaşımın işlədiyi məktəbə getməyə məcbur edib. Ona deyib ki, qardaşımdan açarları alsın. Qardaşım əvvəlcə evin açarını vermək istəməyib, sonra isə ona deyiblər ki, Nigar açarı itirib , ona açar lazımdır.
Buna görə də açarı məcbur olaraq verib. Bəhruz açarı alıb və qapını açıb. Nigarı kəndirdən açan insan da o olub. Sonra isə təcili yardıımı və polisi çağırıblar.
