Akif Abdullayev sələfinə şükür oxutdurur
Bölgələrdə fəaliyyət göstərən bəzi Tibbi-Sosial Ekspert Komissiyalarının yarıtmaz fəaliyyəti yerli sakinləri və təbii ki, ilk növbədə bu qurumların xidmətlərinə ehtiyacları olan əlil və xəstə vətəndaşları son dərəcə narahat edir. Bu vətəndaşların kütləvi informasiya vasitələrinə ünvanladıqları çoxsaylı şikayət ərizələrində TSEK rəhbərlərinin törətdikləri müxtəlif özbaşınalıqlar və ciddi qanun pozuntularına, yol verilən çeşidli korrupsiya hallarına dair ətraflı məlumatlar təqdim olunur. Redaksiyamıza daxil olan şikayət məktublarında, fəaliyyətində daha çox neqativ halların müşahidə olunduğu bu tip müəssisələrdən biri kimi də məhz 15 saylı TSEK təqdim olunur. Qeyd edək ki, mətbuat səhifələrində 15 saylı TSEK-in sədri Akif Abdullayev qanunsuz əməllərindən bəhs edən tənqidi materiallar mütəmadi olaraq dərc olunur. Buna baxmayaraq nə Əmək və Əhalinin Sosial Müdafiəsi Nazirliyi, nə də digər aidiyyalı qurumlar tərəfindən onun əməllərinə son qoyulması istiqamətində hələ də heç bir tədbir görülməmişdir.
Qaynarxett.az-ya daxil olan məlumatda bildirilir ki, bir neçə gün əvvəl Akif Abdullayev elə iş yerindəcə süründürməçilikdən bezar olmuş xəstələrin qəzəbinə tuş gəlib. Şikayyətçilər TSEK sədrindən bu qədər get-gələ salınmaqlarının səbəbini soruşublar. Mənbələr bildirir ki, Akif Abdullayev bir neçə ay əvvəl xəstələrdən təxminən 10 nəfərdən artıq şəxsə əlillik dərəcəsi veriləcəyini bildirmişdi. Bu dəfə isə TSEK sədri xəstələri son ümidlərini qırıb: “Mən nə edə bilərəm ki, hər bir xəstəlik sənədi üçün, diaqnozları kodlaşdırıb sistemə yükləmək üçün xəstəxanalarda yüksək məbləqdə pul tələb edirlər..”
Qeyd etmək lazımdır ki, 15 saylı Xacmaz Tibbi Sosial Ekspert Komissiyasının sədri Akif Abdullayev bu vəzifədə uzun müddətdir ki, işləyir. Bu müddət ərzində o, saysız-hesabsız insanların saglamını əlil, xəstələrini isə zəlil edib.Redaksiyamıza təqdim edilən şikayət ərizəsində deyilir:" Akif Abdullayev bura baş hıkim təyin ediləndən sonra 15 saylı TSEK-də əlillik dərəcələrinin müəyyənləşdirilməsi işində çox ciddi nöqsanlar başladı.
Elə bunun nəticəsidir ki, Xacmazda saxta əlillərin sayı durmadan artır."
Qeyd edək ki, son vaxtlar bir çox mətbuat səhifələrində 15 saylı TSEK-in sədrinin eyni tərkibli qanunsuz əməllərindən bəhs edən tənqidi materiallar dərc olununurdu. Belə materiallardan əksəriyyətində bildirilirdi ki, Xacmaz 15 saylı Tibbi Sosial Ekspert Komissiyası tərəfindən vətəndaşlara əsassız olaraq əlillik dərəcələrinin verilməsinə dair konkret faktlar mövcuddur. Belə görünür ki, Akif Abdullayev bu istiqamətdə TSEK-in fəaliyyətində heç bir dəyişiklik etmək niyyətində deyil. Ümumiyyətlə isə bu tibb müəssisəsinin yarıtmaz fəaliyyəti mütəmadi olaraq rayon sakinlərinin narazılıqlarını doğurmaqdadır. Şikayət məktubunda da qeyd olunur ki, 15 saylı TSEK-in əməkdaşları bir çox hallarda əmək qabiliyyətini itirən şəxslər barəsində əlillik dərəcəsinin təyin edilməsində süründürməçiliyə yol verirlər. Hər dəfə bir bəhanə ilə əlillik dərəcəsi almaq istəyən şəxslərin tələbləri yerinə yetirilmir. Bunun müqabillində isə vətəndaşlardan əlillik dərəcələrinin verilməsi üçün külli miqdarda rüşvət istənildiyi bildirilir. Qeyd olunur ki, I qrup əlillik dərəcəsi almaq üçün minimum 1000 manat, II qrup üçün 600-700 manat, III qrup üçün isə 400 manat rüşvət tələb olunur. Həmçinin əlavə edilir ki, pulu olmayan və fiziki qüsurlu şəxslərin əlillik dərəcəsinin verilməsi prosesi həyata keçirilmir. Ümumiyyətlə son vaxtlar bölgələrdə fəaliyyət göstərən Tibbi-Sosial Ekspert Komissiyalarının yarıtmaz fəaliyyəti ilə bağlı vətəndaşların aidiyyatı olan qurumlara ünvanladıqları şikayət ərizələrində bir say artımı müşahidə olunmaqdadır. Bunu nəzərə alaraq ehtimal etmək olar ki, Əmək və Əhalinin Sosial Müdafiəsi Nazirliyi tərəfindən bu sahədə həyata keçiriləcək islahatlar, strukturun məhz Akif Abdullayev kimi kadrlardan “təmizlənməsini” də nəzərdə tutur. Əks halda isə islahatlar paketi heç bir müsbət nəticəyə səbəb ola bilməyəcək.
Araşdırmalar davam edir
Qaynarxett.az
