“Bank VTB Azərbaycan” vasitəsilə Moskvaya pul köçürmələri dayandırılıb.
qaynarxett.az Axar.az-a istinadən xəbər verir ki, buna səbəb Azərbaycandan Ermənistana pul köçürülməsidir. Məlumatda qeyd olunur ki, “Bank VTB”nin Ermənistanda da filialının olması və Bakıdan İrəvana dolayı yolla – Moskva ofisindən keçməklə pul köçürülməsinin MTN tərəfindən müəyyənləşdirilməsindən sonra Mərkəzi Bank belə bir qadağa tətbiq edib.
“Bank VTB Azərbaycan”dan Axar.az-a faktı qismən təsdiqləyərək bildirdilər ki, belə bir qadağa Mərkəzi Bank tərəfindən qəbul olunmuş qərarda əksini tapıb və təkcə bir banka aid deyil:
“Bank VTB Azərbaycan” müştərilərə “Western Union” və “Zolotaya Korona” sistemləri vasitəsilə yaxın və uzaq ölkələrə pul köçürmələri təklif edirdi. Ancaq hazırda bank “Zolotaya Korona” sistemi vasitəsilə pul köçürmələrini dondurub. Azərbaycan Respublikasının işğal altında olan ərazilərində qanunsuz fəaliyyət göstərdiyi üçün Mərkəzi Bank tərəfindən qəbul olunmuş qərara əsasən “Zolotaya Korona” pul köçürmə sistemi ilə işgüzar münasibətlər dayandırılıb. Bunun nə vaxta qədər davam edəcəyi barədə heç bir məlumatımız yoxdur. Hazırda “Bank VTB”da pul köçürmələri yalnız “Western Union” vasitəsilə həyata keçirilir”.
2014-cü il yanvar ayının 15-dən etibarən ölkənin 13 aparıcı bankı – “Azərbaycan Beynəlxalq Bankı”, “Xalq Bank”, “Kapital Bank”, “Bank Standard”, “Texnika Bank”, “Bank Respublika”, “Unibank”, “Dəmir Bank”, “Muğan Bank”, “Bank of Baku”, “Ata Bank”, “Access Bank”, “Bank of Azerbaijan” - “Zolotaya Korona” pul köçürmələri sistemi ilə əməkdaşlığı dayandırıb.
Maraqlıdır ki, internet resurslarında 2003-cü ildən fəaliyyət göstərən “Zolotaya Korona”nın bu gün Azərbaycandakı agentləri də açıqlanır: “AFB Bank”, “Azərbaycan Kredit Bankı”, “Zaminbank”, “Gəncə Bank”, “NBC Bank”, “Bank Nikoil”, “Parabank”, “Turanbank”, “Yunited Kredit Bankı”, “Deka Bank”, “Əmrahbank”, “Azər-Türk Bank”, “Qafqaz İnkişaf Bankı”, “Expressbank” və Pakistan Milli Bankının Bakı filialıdır. Adı çəkilən bank və bank filiallarının “Zolotaya Korona” sistemindən imtinası barədə heç bir məlumat yoxdur.
Xatırladaq ki, Bakıda 30 min erməninin yaşadığı rəsmən açıqlanıb.
