Bu barədə dövlət başçılarının mətbuata birgə bəyanatını, tərəflər arasında əldə olunan strateji nəqliyyat-logistika razılaşmalarını və Qarabağın bərpasında Türkmənistanın rolunu şərh edərkən Milli Cəbhə Partiyasının (MCP) başqanı, deputat Razi Nurullayev bildirib.
“Füzulidə Məscid İnşası Qardaş Türkmənistan Xalqının Səmimi Münasibətinin Göstəricisidir”
Millət vəkili iki ölkə arasındakı münasibətlərin möhkəm mənəvi və mədəni təməllər üzərində qurulduğunu diqqətə çatdırıb:
“Azərbaycan və Türkmənistan arasında ikitərəfli əlaqələr tarixi bağlar, dərin mədəni və mənəvi tellər üzərində yüksəlir. Ölkə Prezidenti İlham Əliyevin də bəyan etdiyi kimi, Türkmənistanın Ümummilli Lideri, Arkadağ Qurbanqulu Berdiməhəmmədovun təşəbbüsü ilə Füzuli şəhərində məscidin inşasına başlanılması qardaş ölkənin xalqımıza olan səmimi və dostcasına münasibətinin bariz göstəricisidir. Bakı ilə Aşqabadın, Arkadağ ilə Füzulinin qardaşlaşmış şəhərlər elan edilməsi, qarşılıqlı Mədəniyyət Günlərinin keçirilməsi birliyimizin əyani sübutudur. Bu dostluq platforması gələn ay keçiriləcək Hökumətlərarası Komissiya çərçivəsində yeni birgə layihələrlə daha da konkret məzmun kəsb edəcəkdir”.
“Azərbaycanın Mərkəzi Asiya Şurasına Üzvlüyü Region Üçün Tarixi Hadisədir”
MCP lideri Azərbaycanın xarici siyasətində Mərkəzi Asiya regionu ilə inteqrasiyanın yeni geosiyasi mərhələyə qədəm qoyduğunu vurğulayıb:
“Aşqabadın Azərbaycanın Mərkəzi Asiya Dövlət Başçılarının Məşvərət Şurasına tamhüquqlu üzv qəbul edilməsində nümayiş etdirdiyi fəal dəstək tarixi hadisədir. Coğrafi baxımdan fərqli görünsək də, mədəni-tarixi bağlarımız və bu gün birgə həll etdiyimiz regional problemlər böyük Mərkəzi Asiyanın vahid geosiyasi və geoiqtisadi bölgə kimi formalaşmasını şərtləndirir. Bu çoxtərəfli formatda fəal tərəfdaşlıq regional təhlükəsizlik və inkişaf üçün yeni imkanlar açır”.
Qlobal enerji və nəqliyyat marşrutlarının təhlükəsizliyində Bakı-Aşqabad xəttinin əvəzsiz rol oynadığını deyən deputat fikirlərini belə yekunlaşdırıb:
“Bu gün dünyada etibarlı və təhlükəsiz nəqliyyat dəhlizlərinin sayı çox azdır. Azərbaycan və Türkmənistanın nəqliyyat-logistika sahəsindəki uzunmüddətli əməkdaşlığı yalnız regional deyil, qlobal strateji əhəmiyyət daşıyır. Dövlət başçımızın qeyd etdiyi kimi, güclü siyasi qarşılıqlı fəaliyyət olmasaydı, coğrafi şərait təkbaşına səylərimizi birləşdirməyə yetməzdi. Hər iki ölkə zəngin enerji ehtiyatlarına malikdir və bu resursların koordinasiyalı idarə edilməsi, Hörmüz və Xəzər hövzəsi üzərindən yük axınlarının artırılması prioritetdir. Biz Türkmənistanın neytrallıq siyasətini, sosial-iqtisadi inkişaf sahəsindəki böyük uğurlarını qardaş dövlət olaraq həmişə dəstəkləyirik və bu tərəfdaşlıq regionda əbədi sabitliyin dayağı olacaqdır”.
