Azərbaycan güləşçilərinin Tiranada keçirilən Avropa çempionatında həm sərbəst, həm də yunan-Roma güləşi üzrə komanda hesabında birinci olması tarixi bir nailiyyətdir. Prezident İlham Əliyevin qalib idmançıları qəbul edərkən vurğuladığı məqamlar – nəsillərin varisliyi, seleksiya prosesinin düzgün qurulması və idmançılarımızın ləyaqətli davranışı dövlətin bu sahəyə baxışının ən yüksək ifadəsidir.
Bu fikirləri Milli Cəbhə Partiyasının (MCP) başqanı, deputat Razi Nurullayev açıqlamasında dövlət başçısının güləşçilərlə görüşünü şərh edərkən bildirib.
Millət vəkili idman uğurlarının dövlətçilik və beynəlxalq imic baxımından əhəmiyyətini belə xarakterizə edib:
“Azərbaycanın Avropanın ən güclü güləş ölkəsi kimi özünü təsdiqləməsi və bayrağımızın yüksəlməsi beynəlxalq imicimizə böyük töhfədir. Cənab Prezidentin də qeyd etdiyi kimi, Avropa yarışlarında idmançılarımıza qarşı zaman-zaman göstərilən ədalətsizliyə və qərəzli yanaşmaya baxmayaraq, güləşçilərimizin həm xalça üzərində, həm də ondan kənarda nümayiş etdirdikləri ləyaqətli mübarizə hər kəsə ən yaxşı cavabdır. Bu, sadəcə idman uğuru deyil, həm də milli dəyərlərimizin təntənəsidir.”
MCP başqanı idmanın sosial əhəmiyyətini və gənclərin tərbiyəsindəki rolunu xüsusi vurğulayıb:
“İdman gəncləri küçə həyatından, narkomaniya və digər zərərli vərdişlərdən uzaqlaşdıran ən effektiv vasitədir. Bizim çempionlarımızın ləyaqətli davranışı, vətənpərvərliyi və cəmiyyətdəki nümunəvi obrazı minlərlə gənc üçün ən yaxşı modeldir. Gənclərin kütləvi şəkildə idman zallarına yönəlməsi, vaxtlarını faydalı keçirməsi həm də cinayətkarlığın azalması və sağlam cəmiyyətin formalaşması deməkdir. Dövlətin bölgələrdə yaratdığı idman infrastrukturu gənclərimizin enerjisini düzgün məجرaya yönəldir, onları pis vərdişlərdən qoruyur və ləyaqətli vətəndaş kimi yetişdirir”.
