Bu barədə dövlət başçısının Bakı Enerji Həftəsinin rəsmi açılış mərasimindəki çıxışını şərh edərkən Milli Cəbhə Partiyasının (MCP) başqanı, deputat Razi Nurullayev bildirib.
Milli Müstəqillik və Sərvətlərin Sosial İnfrastruktura Yatırılması
Millət vəkili xüsusi olaraq vurğulayıb ki, 1994-cü ildə ərazisinin 20 faizi işğal altında olan, ağır iqtisadi böhran və yoxsulluqla üzləşən Azərbaycan məhz müdrik enerji siyasəti sayəsində ayağa qalxıb. Onun sözlərinə görə, neft və qaz gəlirlərinin düzgün idarə edilməsi ölkənin hərbi Qələbəsinin, eləcə də vətəndaşların rifahının əsas təminatçısı olub:
“Prezident çox mühüm bir fəlsəfəni diqqətə çatdırdı: Ölkələr neft və qazın mövcud olmasına görə yox, bu gəlirlərdən necə istifadə etdiklərinə görə mühakimə olunmalıdır. Azərbaycan bu resursları xalqın yaxşı yaşamasına, sosial infrastruktura, təhsilə, səhiyyəyə və güclü ordu quruculuğuna yatıraraq dünyaya örnək oldu. Ordunu qurmaq üçün vəsaitimiz olmasaydı, torpaqlarımızı işğaldan azad edə bilməzdik. Bu gün yoxsulluğun 5 faizə enməsi, xarici borcun ümumi daxili məhsulun cəmi 6 faizinə düşməsi və ehtiyatlarımızın borcumuzu 18 dəfə üstələməsi çox böyük iqtisadi və sosial uğurdur.”
Qlobal Enerji Liderliyi və Avropa İttifaqı ilə Tərəfdaşlıq
MCP başqanı dövlət başçısının beynəlxalq miqyasda qorunan praqmatik yanaşmasını yüksək qiymətləndirib. O qeyd edib ki, Bakı-Tbilisi-Ceyhan, Cənub Qaz Dəhlizi (TANAP və TAP) kimi nəhəng layihələrlə Azərbaycan qlobal enerji təhlükəsizliyinin mərkəzinə çevrilib:
“Azərbaycan qazını alan ölkələrin sayının 12-dən 16-ya yüksəlməsi və onların 10-nun Avropa İttifaqı üzvü olması ölkəmizin yüksək diplomatik fəaliyyətinin və etibarlı tərəfdaş imicinin göstəricisidir. Cənub Qaz Dəhlizi olmadan bu gün Avropa enerji bazarını təsəvvür etmək qeyri-mümkündür. Üstəlik, SOCAR-ın artıq beynəlxalq səviyyədə investisiya yatıran gücə çevrilməsi dövlətimizin iqtisadi qüdrətinin miqyasını göstərir.”
Deputat əlavə edib ki, mövcud qaz ehtiyatlarının ən azı növbəti yüz il üçün kifayət etməsinə baxmayaraq, bərpaolunan enerji sahəsinə böyük yatırımların qoyulması Azərbaycanın gələcəyə hesablanmış məsuliyyətli siyasətidir:
“Gələn ilin sonunadək günəş və külək enerjisi gücünün 2 giqavata çatdırılması planı, ‘Qara dəniz Enerji Kabeli’ və Mərkəzi Asiyadan çəkiləcək yaşıl enerji marşrutları Azərbaycanı həm də elektrik enerjisi ixracatçısı kimi zirvəyə qaldıracaq. Eyni zamanda, uğurla işləyən Şərq-Qərb dəhlizinin yeni qolu olacaq Zəngəzur dəhlizinin inşası regionda tamamilə yeni reallıq və əməkdaşlıq formatı yaradacaq. Bütün bu tarixi nailiyyətlərin memarı və aparıcı qüvvəsi məhz xalqın maraqlarını hər şeydən uca tutan Azərbaycan dövlətidir.”
