Bunu açıqlamasında Milli Məclisin deputatı Jalə Əliyeva səsləndirdi.
Onun sözlərinə görə, bu addım göstərir ki, işğaldan azad edilmiş ərazilər artıq Azərbaycanın siyasi ritorikasında deyil, real dövlət həyatında öz yerini tutur:
“Prezidentin Novruzu Qarabağda qeyd etməsi təkcə bayram ənənəsi deyil, dövlətin suverenliyinin, qayıdış siyasətinin və yeni həyatın nümayişidir. İlham Əliyev 2021-ci ildə Şuşada Novruz müraciətində “Novruzu Qarabağda qeyd edəcəyik” vədinin yerinə yetdiyini vurğulamışdı, 2024-cü ildə isə Novruz tonqalını Xankəndidə alovlandırmışdı. Bu xətt göstərir ki, bayramların həmin məkanlarda keçirilməsi ardıcıl dövlət-siyasi mesajdır”.
Millət vəkili əlavə etdi ki, ölkə liderinin sakinlərlə birbaşa görüşməsi və bayramlaşması “Böyük Qayıdış” siyasətinin humanitar tərəfini önə çıxarır:
“Azad edilmiş ərazilərə qayıdış yalnız infrastruktur, yol, məktəb və yaşayış binaları ilə ölçülmür. İnsanların öz torpağında yenidən bayram sevinci yaşaması bu prosesin ən təsirli göstəricilərindən biridir. Rəsmi sənədlərdə də azad edilmiş ərazilərə qayıdış Azərbaycanın əsas milli prioritetlərindən biri kimi təqdim olunur. Bu səmimilik cəmiyyətdə dövlət-vətəndaş bağlılığını gücləndirir. Çünki insanlar üçün vacib olan təkcə yüksək səviyyəli siyasi mesaj deyil, həm də dövlət başçısının həmin torpaqlarda insanlarla bir yerdə olması, onların sevincini bölüşməsidir. Bu, xüsusilə illərlə yurd həsrəti yaşayan ailələr üçün mənəvi dəstək və psixoloji güvən mesajıdır. Belə davranış ölkə ictimaiyyətinə də onu göstərir ki, Qarabağ artıq uzaq bir siyasi mövzu deyil, gündəlik milli həyatın canlı parçasıdır”.
Jalə Əliyevanın fikrincə, burada beynəlxalq auditoriyaya da ünvanlanan mühüm mesaj var.
“Prezidentin bayramları azad olunmuş ərazilərdə keçirməsi həmin torpaqlarda həyatın bərpa edildiyini, idarəçiliyin tam şəkildə təmin olunduğunu və Azərbaycanın öz suveren məkanında normal həyat qurduğunu nümayiş etdirir. Bu, postmünaqişə dövründə ən güclü siyasi təsdiqlərdən biridir.
Bu yanaşmanı ümumilikdə belə qiymətləndirmək olar: Prezident İlham Əliyevin hər bayramı azad olunmuş torpaqlarda keçirməsi sadəcə protokol jesti deyil, bu, qələbənin siyasi təsdiqi, qayıdışın mənəvi tamamlanması və xalqla dövlət arasında birliyin praktik nümayişidir. Sakinlərlə bayramlaşması və ünsiyyətdəki səmimiliyi isə bu siyasətə insani məzmun verir. Məhz buna görə bu səhnələr cəmiyyətdə təkcə informasiya kimi deyil, qürur və inam hissi yaradan hadisə kimi qarşılanır”, – deyə müsahibimiz yekunlaşdırdı.
