Prezident İlham Əliyevin avqustun 11-də Azərbaycan Televiziyasına verdiyi müsahibə və Muxtar Respublikaya səfəri çərçivəsində həyata keçirilən layihələr göstərir ki, Naxçıvanın iqtisadi inkişafında yeni mərhələ qədəm qoyur. Burada əsas məqsəd mövcud potensialı daha səmərəli şəkildə iqtisadi dövriyyəyə cəlb etmək, istehsalı genişləndirmək və regionu daha güclü iqtisadi mərkəzə çevirməkdir. Bu baxımdan Naxçıvan Sənaye Parkının yaradılması xüsusi əhəmiyyət daşıyır. Sənaye parkı yalnız yeni müəssisələrin yerləşəcəyi ərazi kimi qiymətləndirilməməlidir. Onun əsas funksiyası istehsal zəncirinin formalaşdırılması, sahibkarlıq üçün əlverişli mühitin genişləndirilməsi, investisiyaların cəlb olunması və yeni iş yerlərinin açılmasıdır. Naxçıvanda sənaye sahəsinin inkişaf etdirilməsi ilə bağlı dövlət proqramında da bu istiqamət prioritetlərdən biri kimi müəyyənləşdirilib.”
Millət vəkili Göydəniz Qəhrəmanov bu fikirləri açıqlamasında səsləndirib.
Deputat qeyd edib ki, Prezidentin səfəri zamanı Naxçıvan Sənaye Parkının ərazisində 300 meqavat gücündə istilik elektrik stansiyasının təməlinin qoyulması iqtisadi inkişafla enerji təhlükəsizliyinin necə əlaqələndirildiyini nümayiş etdirir: “Müasir sənaye müəssisələrinin sabit enerji təminatı olmadan davamlı fəaliyyəti mümkün deyil. Deməli, yeni generasiya gücünün yaradılması gələcək istehsal layihələri üçün də mühüm infrastruktur bazası formalaşdırır. Naxçıvanın iqtisadi gələcəyi yalnız sənaye ilə məhdudlaşmır. Muxtar respublikanın əlverişli coğrafi mövqeyi, tarixi-mədəni irsi, təbii imkanları və bərpa olunan enerji potensialı bir-birini tamamlayan çoxsaylı inkişaf istiqamətləri yaradır. Nəqliyyat bağlantılarının genişlənməsi isə bütün bu imkanların daha geniş bazarlara çıxışını asanlaşdıracaq. İstehsal olunan məhsulların daşınması, xammal təminatı və yeni investisiya layihələrinin reallaşdırılması baxımından yolların və dəmir yolu bağlantılarının inkişafı xüsusi əhəmiyyət daşıyır. Bu mənada Naxçıvanın gələcək iqtisadi mənzərəsini bir neçə istiqamətin sintezi kimi təsəvvür etmək mümkündür: sənaye parkları istehsal yaradacaq, enerji layihələri həmin istehsalın dayanıqlığını təmin edəcək, nəqliyyat infrastrukturu məhsulların bazarlara çıxışını asanlaşdıracaq, turizm və xidmət sektoru isə iqtisadi fəallığın daha da genişlənməsinə şərait yaradacaq. Səfər zamanı şəhər mühitinin yenilənməsi istiqamətində görülən işlər də bu ümumi strategiyanın tərkib hissəsidir. Naxçıvan şəhərinin gələcək inkişafını müəyyən edən Baş Planın hazırlanması şəhərsalma prosesinə uzunmüddətli yanaşmanın tətbiq olunduğunu göstərir. Beşulduzlu mehmanxana kompleksinin təməlinin qoyulması da təsadüfi deyil. Müasir turizm infrastrukturu imkanları iqtisadi potensialın dahada güclənməsinə xidmət edəcək. Bütün bunların arxasında daha geniş bir yanaşma dayanır. Dövlət Naxçıvanı yalnız mövcud bir ərazi kimi deyil, gələcəkdə öz iqtisadi imkanları hesabına daha böyük dəyər yaradan, investisiya cəlb edən, istehsal və xidmət sahələrini inkişaf etdirən müasir region kimi görür. Ən mühüm nəticə isə budur ki, Naxçıvanın inkişafında yeni mərhələ ayrı-ayrı layihələrin cəmi deyil, bir-birini tamamlayan vahid iqtisadi model formalaşdırır. Sənayeləşmə, enerji, nəqliyyat, turizm və şəhərsalma paralel şəkildə inkişaf etdikcə muxtar respublikanın iqtisadi çəkisi daha da artacaq.” – deyə, Göydəniz Qəhrəmanov fikirlərini tamamlayıb.
