Bu gün Azərbaycan mədəniyyəti özünün ən parlaq simalarından birini itirdi. Görkəmli sənətkar, milli ruhumuzun dərin və təsirli ifadəçisi Rasim Balayev dünyasını dəyişdi.
Rasim Balayev sənəti ilə sadəcə obraz yaratmırdı — o, tariximizi danışır, milli yaddaşımızı yaşadırdı. Onun baxışlarında bir xalqın taleyi, səsində isə əsrlərin ağrısı və qüruru duyulurdu. “Babək” obrazında azadlıq ruhunu, “Nəsimi” timsalında isə haqq yolunda fədakarlığı yaşadan sənətkar yaratdığı rollarla kino tariximizi aşaraq xalqımızın mənəvi yaddaşına çevrilmişdi.
Onun sənəti dövlət səviyyəsində də yüksək qiymətləndirilib. Azərbaycan Respublikasının Prezidenti İlham Əliyev tərəfindən müxtəlif ali mükafatlara, o cümlədən “İstiqlal” ordeninə layiq görülməsi sənətinə verilən böyük dəyərin bariz ifadəsidir.
Deputat Fatma Yıldırım qeyd edib ki, Rasim Balayev Azərbaycan kino sənətində bütöv bir məktəb, bir mərhələ idi:
“Onun yoxluğu böyük boşluq yaratsa da, yaratdığı irs, qoyduğu iz və qazandığı xalq sevgisi onu daim yaşadacaq.”
Deputat mərhumun ailəsinə, yaxınlarına və bütün xalqımıza dərin hüznlə başsağlığı verib.
Allah rəhmət eləsin. Onun əziz xatirəsi hər zaman qəlbimizdə yaşayacaq.
