Milli Məclisin deputatı,
Qərbi Azərbaycan İcması
İdarə Heyətinin sədri
2025-ci ilin 15 oktyabrı Azərbaycan Respublikasının tarixində sadəcə bir tarixin qeydi deyil, Prezident İlham Əliyevin rəhbərliyinin 22 illiyinin tamamlanaraq yeni bir ulduz kimi parladığı, dövlətçilik salnaməsinin qızıl hərflərlə yazıldığı bir tarixdir. Bu dövr 30 il davam edən kədərli sükuta son qoyan, Qarabağ Zəfəri ilə ölkənin suverenliyini tam bərpa edən, Böyük Qayıdış proqramı ilə unudulmuş torpaqlara yenidən can verən möhtəşəm bir Dirçəliş Dastanına çevrildi. Ümummilli Lider Heydər Əliyevin təməlini qoyduğu milli birlik platforması üzərində yüksələn bu yol, ölkəmizi beynəlxalq arenada qətiyyətli və yenilməz bir dövlət kimi tanıtdı.
Prezident İlham Əliyevin rəhbərliyinin ilk anlarından həyata keçirilən iqtisadi model gələcək qələbələrin sarsılmaz təməli oldu. 2003-cü ildən bu günə qədər Ümumi Daxili Məhsul (ÜDM) adambaşına 769 ABŞ dollarından 7.798 ABŞ dollarına yüksəldi ki, bu da illərlə davamlı və strateji səylərlə qurulan iqtisadi qüdrətin bariz göstəricisidir. Qeyri-neft ÜDM-i isə 4.1 milyard ABŞ dollarından 41.1 milyard ABŞ dollarına çataraq iqtisadiyyatın neft asılılığından qurtuluş yolunu açdı. Bu iqtisadi bünövrə birbaşa xalqın rifahına yönəldildi, yoxsulluq səviyyəsi 2003-cü ildəki 50%-dən dramatik şəkildə azalaraq cəmi 5%-ə endi. Sosial islahatlar çərçivəsində minimum əməkhaqqı 2025-ci ilin yanvarından 400 manata, minimum pensiya isə fevral ayından 320 manata çatdırıldı. Bu gün ölkənin valyuta ehtiyatları 70 milyard ABŞ dollarından yuxarıdır, bu da Azərbaycanın iqtisadi təhlükəsizliyini təmin edən qala rolunu oynayır.
22 illik yolun ən uca zirvəsi və Prezidentin taleyüklü mirası, şübhəsiz ki, Azərbaycanın ərazi bütövlüyünün və suverenliyinin tam bərpasıdır. Bu, Müzəffər Ali Baş Komandan İlham Əliyevin yalnız iqtisadi deyil, həm də polad iradəsinin təntənəsidir. 2020-ci il Vətən müharibəsi və 2023-cü ilin antiterror tədbirləri nəticəsində təqribən 12.000 kv.km ərazi düşmən tapdağından azad edildi. Qələbənin təminatının əsası Prezidentin strateji qətiyyətinə və Ordu quruculuğuna yatırılan nəhəng investisiyalara əsaslanır: 2003-cü ildə 160 milyon ABŞ dolları olan hərbi xərclər, bu gün 34 dəfədən çox artırılaraq təxminən 5.5 milyar ABŞ dolları səviyyəsinə çatdırılıb. Ordu ən müasir texnika, o cümlədən pilotsuz uçuş aparatları (PUA) ilə təmin edildi, bununla da Azərbaycan Ordusu XXI əsrin döyüş meydanında çevikliyin və məharətin simvoluna çevrildi.
Qarabağın azad edilməsi ilə başlayan “Böyük Qayıdış” proqramı çərçivəsində viran qalmış ərazilərdə misli görünməmiş bir yenidənqurma epopeyası başladı. Şuşa şəhəri 2023-cü il üçün “Türk dünyasının mədəniyyət paytaxtı”, 2024-cü il üçün isə ICESCO tərəfindən “İslam dünyasının mədəniyyət paytaxtı” elan edilərək öz tarixi şöhrətini bərpa etdi. Proqramın I mərhələsi 2026-cı ilə qədər tamamlanacaq və bu müddətdə 140 min keçmiş məcburi köçkünün dədə-baba torpaqlarına qayıdışı nəzərdə tutulur. 2021–2025-ci illərdə bu bölgələrə 3 milyard ABŞ dollarından çox investisiya yatırılıb, azad edilmiş ərazilərdə gələcəyə yönələn “yaşıl enerji zonaları” yaradılır.
Ölkənin inkişaf vektorları yalnız yer üzü ilə məhdudlaşmır, Prezident İlham Əliyevin uzaqgörən siyasəti Azərbaycanı həm də kosmik ailənin tamhüquqlu üzvünə çevirmişdir. “Azərkosmos” vasitəsilə orbitə buraxılan peyklər ölkənin telekommunikasiya və kəşfiyyat imkanlarını genişləndirmiş, regionda rəqəmsal transformasiyanın aparıcı qüvvəsinə çevrilmişdir. Bu isə beynəlxalq əlaqələrdə yeni texnoloji tərəfdaşlıqlara yol açmışdır.
Cənab Prezident İlham Əliyevin rəhbərliyi altında Azərbaycan beynəlxalq siyasətdə diplomatiya sənətinin ən yüksək zirvələrini fəth etdi. ABŞ-ın Azərbaycana birbaşa yardımı qadağan edən 907-ci düzəlişin ləğv edilməsi, ölkənin beynəlxalq arenadakı güclü mövqeyinin təsdiqi oldu. Xarici siyasətin mühüm prioritetlərindən biri sırasında Türk Dövlətləri Təşkilatının (TDT) inkişafı dayanır. Təşkilatın tarixi kökləri 2009-cu il Naxçıvan Sazişi ilə yaradılan Türkdilli Dövlətlərin Əməkdaşlıq Şurasına gedib çıxır. Bu çərçivədə Türkiyə ilə münasibətlər "bir millət, iki dövlət" prinsipinə əsaslanaraq ən yüksək müttəfiqlik səviyyəsinə çatmışdır. 2021-ci il Şuşa Bəyannaməsi ilə Azərbaycan və Türkiyə müttəfiqlik münasibətlərini rəsmiləşdirərək, regionda sarsılmaz bir birlik platforması yaratdılar. Eyni zamanda, Pakistanla strateji tərəfdaşlıq da Qafqazda və Cənubi Asiyada sülhün və təhlükəsizliyin güclənməsində həlledici rol oynayır. Bu qardaş ölkələr Azərbaycanın Vətən müharibəsindəki haqlı mövqeyinə qeyd-şərtsiz dəstək vermişlər. Mədəni və humanitar əlaqələrə gəlincə, Azərbaycan tarixi irsinin qorunmasına və beynəlxalq miqyasda təbliğinə böyük əhəmiyyət verir. Bakının İslam Əməkdaşlıq Təşkilatı çərçivəsində, eləcə də UNESCO ilə fəal əməkdaşlığı mədəniyyətlərarası dialoqun mərkəzi kimi çıxış etməsinə şərait yaradır.
Türk dünyası inteqrasiyasının ən bariz təzahürlərindən biri 2024-cü ilin iyul ayında Şuşada keçirilmiş qeyri-rəsmi Zirvə görüşü, digəri isə 6-7 oktyabr 2025-ci il tarixlərində Qəbələ şəhərində uğurla keçirilmiş təşkilatın XII Zirvə Toplantısı oldu. "Regional sülh və təhlükəsizlik" mövzusuna həsr olunmuş bu Zirvə görüşü türk dövlətləri arasında əməkdaşlığın dərinləşməsinə və regionda sabitliyin güclənməsinə xidmət etdi. Azərbaycan TDT Katibliyinin hesabına 2 milyon ABŞ dolları məbləğində vəsait köçürərək, təşkilatın hədəflərinin reallaşmasına dəstək vermişdir. Nəqliyyat sahəsində isə Bakı-Tbilisi-Qars dəmir yolu Orta Dəhlizin ayrılmaz hissəsi kimi Azərbaycanın əlavə sərmayəsi nəticəsində illik yükaşırma qabiliyyəti 1 milyondan 5 milyon tona çatdırılıb, bu da Azərbaycanı Türk dünyasının mühüm tranzit qapısı edir.
Bütün bu nailiyyətlər İlham Əliyevin uzaqgörən, realist və qərarlı siyasətinin nəticəsidir. Onun 22 illik rəhbərliyi Azərbaycanın tarixində dönməz dönüşün, əzmkarlığın və qətiyyətin simvolu kimi yaddaşlara yazılır – bu, yalnız bir Liderin hekayəsi deyil, millətin dirçəlişi, qurtuluşu və yeni Zəfərlərə yüksəlişidir.
