Deputat: Prezident İlham Əliyevin MDB Dövlət Başçıları Şurasının iclasında iştirakı mühüm önəm kəsb edir.

Prezident İlham Əliyevin Tacikistan Prezidenti Emoməli Rəhmonun dəvəti ilə MDB Dövlət Başçıları Şurasının iclasında iştirakı mühüm önəm kəsb edir. Düşənbədə MDB Dövlət Başçıları Şurasının geniş tərkibdə iclasında çıxış edən ölkəmizin başçısı mühüm məsələlərdən bəhs etdi. Tacikistan ilə Azərbaycan arasında ikitərəfli münasibətlərin ardıcıl inkişafı qeyd edildi. Böyük inkişaf potensiala əsaslanan qardaşlıq, dostluq, qarşılıqlı dəstəyə əsaslanan əlaqələrin əhəmiyyəti önə çəkildi.

Bu sözləri Milli Məclisin deputatı Məlahət İbrahimqızı deyib.

O qeyd edib ki, cənab Prezident həmçinin çıxışında humanitar sahədə əməkdaşlığın möhkəmləndirilməsi məsələlərinə toxunub: “Azərbaycanın Şərqi Zəngəzur bölgəsinin Laçın şəhərinin bu il MDB-nin mədəniyyət paytaxtı kimi namizədliyinin dəstəkləndiyi bildirilib. MDB dövlət başçılarının bu məsələdə yekdil mövqeyinə görə minnətdarlıq ifadə edilib. Həmçinin bu ilin iyununda Laçında “MDB-nin mədəniyyət paytaxtı İli”nin açılış mərasiminin keçirildiyi, Azərbaycanın bu qədim torpağının tarixi, mədəni irsi haqqında məlumat verildiyi vurğulanıb. Tədbirdə qonaqlar Laçının Ermənistanın 30 illik işğalından azad ediləndən sonra sürətli dirçəlişinin əyani şəkildə şahidi oldular. Tamamilə dağıdılmış şəhər bir neçə il ərzində ən gözəl və yaşayış üçün rahat şəhərlərdən birinə çevrilib”.

Deputat bildirib ki, ölkəmizin başçısının da vurğuladığı kimi Birliyin həyatında daha bir mühüm hadisə sentyabrın 28-dən oktyabrın 8-dək qədim Gəncə şəhərində – XII əsrin dahi Azərbaycan şairi və mütəfəkkiri Nizami Gəncəvinin vətənində keçirilən III MDB Oyunları olub: “Gəncə ilə yanaşı, Azərbaycanın daha altı şəhərində – Qəbələ, Göygöl, Yevlax, Mingəçevir, Xankəndi, Şəkidə 13 ölkədən – həm MDB üzvləri olan, həm də qonaq ölkələrdən 1600-dən çox idmançı qəbul edilib. Bu qəbildən tədbirlər MDB məkanında və onun hüdudlarından kənarda dostluğu, əməkdaşlığı möhkəmləndirir, bərabərhüquqlu, qarşılıqlı maraqlara və qarşılıqlı hörmətə əsaslanan münasibətlərin güclənməsinə kömək edir. Ölkəmizin başçısı çıxışında bu məqamlarla yanaşı qarşıda duran bir sıra mühüm məsələlərdən də bəhs edib”.
Məlahət İbrahimqızı hesab edir ki, bu gün cənab Prezident İlham Əliyevin qatılmış olduğu regional və qlobal əhəmiyyətli tədbirlər Azərbaycanın artan nüfuzundan, güclənən mövqelərindən, qalib dövlət kimi ortaya qoymuş reallığı ehtiva edir: “Qalib və güclü Azərbaycan bu gün regional və qlobal miqyasda sülhü, əməkdaşlığı təşviq edir. Ölkəmizin ortaya qoyduğu mövqe hər bir dövlətin və xalqın maraqları müstəvisində qarşılıqlı əlaqələrin inkişafına xidmət edir. Bu baxımdan da cənab Prezidentin sərgilədiyi mövqe böyük maraqla qarşılanır və təqdir edilir. Cənubi Qafqazda qalıcı sülhün təmin edilməsi və inkişafa nail olmaq üçün Azərbaycan dövləti tərəfindən mühüm addımlar atılır. Bu eyni zamanda Şərqlə Qərb arasında vacib bağlantıları özündə ehtiva edir”.