Prezidentin Yaxın Şərq Sülh Sammitində iştirakı ölkəmizə və Onun Liderinə olan yüksək etimadın bariz nümunəsidir

Prezident İlham Əliyevin Yaxın Şərq Sülh Sammitində iştirakı ölkəmizə və Onun Liderinə olan yüksək etimadın bariz nümunəsidir. Bu eyni zamanda regional sülh və diplomatiyada Azərbaycanın artan rolu, güclənən mövqeyi ilə bağlıdır. Azərbaycan bu gün regional və qlobal miqyasda sülh və əməkdaşlığın, qarşılıqlı maraqlar müstəvisində əlaqələrin təmin olunmasında maraqlıdır. Sözsüz ki, bunun üçün ən başlıca amil təhlükəsiz etimad mühitinin yaradılmasıdır ki, cənab Prezidentin Liderliyi ilə bu gün Cənubi Qafqazda bu istiqamətdə ciddi addımlar atılır.
Bu sözləri Milli Məclisin deputatı Məlahət İbrahimqızı deyib.
Onun sözlərinə görə, Azərbaycanın ortaya qoyduğu sülh mövqeyi bu gün qlobal miqyasda təqdir edilir: “II Qarabağ müharibəsi nəticəsində BMT-nin çıxarmış olduğu qətnamələri təkbaşına icra edən Azərbaycan bu gün beynəlxalq birliyin ən fəal və etimad göstərilən üzvü kimi vacib proseslərdə yer almaqdadır. Bu mənada cənab Prezidentin Misirdə Yaxın Şərqə Sülh Sammitində iştirakı Azərbaycanın bu prosesə verəcəyə mühüm töhfə ilə izah olunur. Təbii ki, Yaxın Şərq Sülh Sammiti, regionda davam edən münaqişələrin həlli yollarını müzakirə etmək, humanitar böhranların qarşısını almaq və regional əməkdaşlıq imkanlarını dəyərləndirmək məqsədi daşıyırdı. Bu Sammitdə Azərbaycan Prezidenti cənab İlham Əliyevin iştirakı beynəlxalq ictimaiyyət tərəfindən xüsusi diqqətlə qarşılandı. Prezident Əliyevin sərgilədiyi mövqe və Onun diplomatik təmasları Azərbaycanın regional və qlobal siyasətdə artan çəkisinin göstəricisi kimi dəyərləndirilir. Bu baxımdan da Prezident İlham Əliyevin Yaxın Şərq kimi mürəkkəb və ziddiyyətli bir regionla bağlı keçirilən yüksək səviyyəli tədbirdə iştirakı olduqca önəmli idi”.

Deputat hesab edir ki, Azərbaycan ənənəvi olaraq region dövlətləri arasında balanslı münasibətlər saxlayır: “Məhz bu amil ölkəmizin həm İsraillə, həm də Fələstinlə diplomatik münasibətlər qurmasına imkan yaradıb. Eyni zamanda Azərbaycan İslam Əməkdaşlıq Təşkilatının (İƏT) üzvü kimi İslam aləminin bir parçasıdır. Həmçinin ölkəmiz Avropa ilə sıx inteqrasiya prosesindədir. Bu yanaşma Azərbaycanın İslam həmrəyliyinə, həm də sivilizasiyalararası dialoqa verdiyi önəmin mühüm göstəricisidir. Ümimiyyətlə isə Prezident İlham Əliyevin Yaxın Şərq Sülh Sammitində iştirakı Azərbaycanın yalnız regional deyil, qlobal aktor kimi statusunu gücləndirdi”.
Məlahət İbrahimqızı vurğulayıb ki, bu gün Azərbaycan öz torpaqlarını 30 illik Ermənistanın işğalından azad etdikdən sonra bu ərazilərin bərpası ilə yanaşı yeni bir reallığın da əsasını qoyub: “Azərbaycanın sərgilədiyi sülh və əməkdaşlıq nümunəsi artıq qlobal miqyasda təqdir edilir. 30 il dağıdılmış, xarabaya çevrilmiş ərazilərdə Azərbaycan bu gün xariqələr yaradır. Qarabağ və Şərqi Zəngəzur hazırda dirçəlişin  rəmzinə çevrilib. Artıq uzun on illiklər öz ata-baba yurdlarından köçmüş soydaşlarımız evlərinə qayıdır. Bu evləri isə Azərbaycan dövləti məhz öz imkanları ilə ən yüksək səviyyədə inşa edir. Həmin ərazilərdə isə yaşayış evləri ilə yanaşı bütün zəruri infrastruktur bərpa edilir. Çünki erməni vandalları ərazidəki yaşayış və sosial infrastrukturla yanaşı ekologiyanı da zədələyib, ekosistemi pozub. Bu mənada Azərbaycan dövləti dağıntının müharibənin nə olduğunu və onun ağır nəticələri aradan qaldıraraq yenidən canlamanın necə mümkün olacağının nümunəsini ortaya qoyub”.